Renault ကားကြီးတွေရဲ့ Air Dryer နှင့် ပက်သက်သမျှ
Updated: Oct 9, 2019
Renault မောင်းတဲ့ ကြင်နာတတ်သော ယာဉ်မောင်းတို့ရေ …
Renault တွဲခေါင်းကားတွေရဲ့ Air Dryer နဲ့ ပက်သက်သမျှ ...
သိထားသင့်တာလေးတွေကတော့ ...
တို့တိုင်းပြည်မှာ Renault နဲ့ DAF တွဲခေါင်းတွေရဲ့ လေလိုင်းမှာ ပြသနာအဖြစ်များကြတယ် …
ဘာကြောင့်ဆိုတော့ ပူ/နွေး/စိုစွတ် တဲ့ Tropical Weather Zone ရှိတဲ့ တို့တိုင်းပြည်အတွက်တော့ သူ့မှာတပ်ဆင်ထားတဲ့ လေလိုင်း အသုံးချမှုစနစ်က ပြသနာဖြစ်ပေါ်လာစေတယ် …
ဒါကိုလဲ မူရင်းထုတ်လုပ်သူတွေက ဝန်ခံထားပြီးပါပြီလေ …
အဲ့ဒီတော့ တို့တိုင်းပြည်မှာရောက်ပြီးကားတွေအတွက် တခုခုတော့ အဖြေရှာရပါမယ် …
အအေးပိုင်းအတွက်သာရည်ရွယ်ထားတဲ့ လေလိုင်း အသုံးချမှုစနစ် Software Data Set ကို ပြုပြင်ပေးဖို့လိုတယ် … နည်းပညာအခေါ်အရ Parameter Value တွေကို ပြောင်းဖို့လိုတယ် …
ဒီလိုလုပ်တာကို ဆော့ဝဲ ပြန်ပြင်ရေးတာ Re-Program လုပ်တယ်ခေါ်တယ် …
ယာဉ်မောင်းတွေနားလည်အောင်အလွယ်ဥပမာပေးရရင် …
ကားကို ၁နာရီ စက်နိုးထားတယ်ဆိုကြစို့ …
Air Compressor က လေကိုထုတ်ပေးနေပြီ …
Air Dryer က ထုတ်ပေးတဲ့လေကို ခြောက်သွေ့အောင်လုပ်မယ် ချွေးစစ်မယ်... ပြီးရင် သက်ဆိုင်ရာခွဲဘားတွေဆီပို့ပေးမှာပါ …
စစ်ထုတ်လိုက်နိုင်တဲ့ ချွေးအရည် ကို ၁လီတာရေသန့်ဘူးနဲ့ ဥပမာ တိုင်းတာလိုက်ကြစို့ …
တို့လိုပူနွေးစိုစွတ်တဲ့တိုင်းပြည်မှာ နာရီ ၁သောင်းမောင်းရင် ချွေး ၁လီတာရေသန့်ဘူးရတယ်ဆိုကြစို့ …
အေးတဲ့တိုင်းပြည်မှာတော့ နာရီ ၂သောင်းမောင်းမှ ချွေး ၁လီတာရကြတယ်လေ ..
ထုတ်ထားတဲ့ အခြောက်ခံ Processing System စနစ်က နာရီ ၂သောင်းစာ အစီစဉ် …
တို့ဆီမှာက နာရီ ၁သောင်းနဲ့တင် ချွေးကိစ္စပေါ်နေတော့ ကျန်တဲ့ နာရီ ၁သောင်းစာ ထွက်တဲ့ချွေးက ဘယ်ကိုရောက်နိုင်မလဲ …
ခွဲဘား ဖြတ်ဘားတွေဆီကို ဒီအရည်တွေရောက်မှာပါပဲ။ ရောက်တော့ ဘားတွေပျက် ကြောင်တာတွေကြောင် …
အဆိုးဆုံးဖြစ်နိုင်ခြေများတာက Air Filter / Air Dryer Filter ကို အရည်သွေးညံ့တာသုံးထားရင် ပိုဖြစ်နိုင်ဖို့သေချာပါတယ် …
Renault Air Dryer တွေက Processing System ဆားကစ်တွဲရက်ပါလို့ ဈေးကြီးတဲ့ အပိုပစ္စည်းစာရင်းဝင်ပါ ...
Renault Air Dryer ပြသနာ ဘယ်လိုဖြစ်သလဲ ...
(၁) Air Line Error မီး အမြဲပေါ်နေတတ်ပါတယ်
(၂) Transmission Error မီး အမြဲပေါ်နေတတ်ပါတယ်
(၃) Parking Brake P မီး ပေါ်လိုက်ပျောက်လိုက်ဖြစ်တတ်ပါတယ်
(၄) နောက်တွဲဘရိတ်အမိနည်းပြီး နောက်ဘီး Disk Drum ကွဲတတ်ပါတယ်
(၅) APM Calibration မီးပေါ်လာတတ်ပါတယ်
(၆) Air Dryer ကလေစိမ့်ရာကလည်းစတတ်ပါတယ်
Renault Air Dryer ပြသနာ မဖြစ်အောင်ဘယ်လိုကာကွယ်မလဲ …
(၁) Air Processing Software Parameter တွေကို နဲနဲကစားပေးရပါတယ် …
(၂) APM Software Re-Program လုပ်ရပါတယ် …
(၃) Air Filter / Air Dryer စစ်အကောင်းစားကိုသာ မပျက်မကွက်လဲရန် ...
- ရန်-မန်း ၆ခေါက်
- မန်း-မူဆယ် ၅ခေါက်
(၄) လေအိုးကို အခေါက်တိုင်းချွေးထုတ်ရန် လေစစ်သန့်ရှင်းရေး အမြဲလုပ်ရန်
Renault Air Dryer ပြသနာ ဖြစ်ရင်ဘာလုပ်ရမလဲ…
သက်တမ်းစေ့လို့ဖြစ်ဖြစ် အပေါ်က ဖော်ပြခဲ့ဖူးတဲ့ အချက်တွေဖြစ်လို့ဖြစ်ဖြစ် ဖြစ်သွားခဲ့ရင်တော့ နီးစပ်ရာ ပြင်တတ်တဲ့နေရာမှာ …
Dryer အလုံးလိုက်မလဲခင် လုပ်သင့်တာကတော့ ...
(၁) အရင်ဆုံး Air Dryer (APM) Software Re-Program လုပ်သင့်ပါတယ်
(၂) လက်ပူတိုက်ထားတဲ့ Air Connection Line တွေကို သေချာအောင်ပြန်စစ်သင့်ပါတယ်
(၃) လေထွက်နှုန်း Air Flow rate တွေကို စံနှုန်းအတွင်းရှိ မရှိ သေချာအောင်စစ်သင့်ပါတယ်
(၄) လေထုတ်နှုန်း - လေသုံးနှုန်း (Processing rate / Consumption rate) တွေ အချိုးညီမညီစစ်သင့်ပါတယ်
(၅) အပေါ်က အချက်တွေ တခုမှမကိုက်ညီ ဘူးဆိုရင် အလုံးလိုက်လဲရပါမယ်။ သက်တမ်းအရ အဟောင်းကိုတော့မလဲသင့်ပါ။